«Բարոյական առումով Նարեկ Սարգսյանը հանցագործ է». «Փակ շուկայի օրինակով կորցնում ենք հրապարակը»
«Անկախության տարիներին Երևանի քաղաքաշինությունը սուրը վերցրած ոչնչացնում է Երևանի պատմությունը: Ոչնչացնում են Երևանը էկոլոգիական առումով, պատմամշակութային առումով»,- ասուլիսում նման դիտարկում արեց «Հանուն կայուն մարդկային զարգացման» ասոցիացիայի նախագահ Կարինե Դանիելյանը:
Նա դեմ արտահայտվեց քաղաքապետարանի կողմից Հանրապետության հրապարակը վերակառուցելու մասին հայտարարած բաց մրցույթին:
Ըստ նրա, կենտրոնը գնալով խտացրին, կոլապսի բերեցին, Հանրապետության հրապարակի շրջապատում բարձրացրեցին բարձրահարկ շենքեր, իսկ այժմ էլ ուզում են հանահունչ դարձնել: «Եթե մի փոքր թույլտվություն տան, Փակ շուկայի օրինակով հրապարակը կորցնում ենք»,- շեշտեց նա` կարծիք հայտնելով, որ հնարավոր է համարում Հրապարակում ամեն ինչ կառուցեն:
«Չի կարելի հրապարակին ձեռք տալ»,- ընդգծեց Կ. Դանիելյանը: Նրա դիտարկմամբ, ընդհանրապես միայն քաղաքապետարանի քաղաքաշինական խորհրդին կից ճարտարապետության հանձնաժողովում այս հարցի քննարկումը սխալ է, պետք է քննարկում կազմակերպվեր քաղաքաշինական խորհրդում, որը ձևավորված չէ:
Կ. Դանիելյանը առաջարկում է հետ վերցնել հայտարարությունը, քննարկում կազմակերպել: Նա կարծում է, որ միայն Լենինի արձանի տեղը կարելի է ինչ-որ բան կառուցել, բայց դա էլ պետք է քննարկվի:
Այս ամենը, ըստ Կարինե Դանիելյանի, ամենաթողության հետևանք է. «Գորիսում ամենաթողությունն արտահայտվեց կրակոցներով, իսկ այստեղ` ազգ, սա քեզ համար սրբություն է, ահա թե ինչ կարող ենք անել»:
Նա նշեց, որ Երևանի գլխավոր ճարտարապետ Նարեկ Սարգսյանը քաղաքը փոխում է իր ճաշակով` բարձրացնելով էկոլոգիական ռիսկերը, ոչնչացնելով պատմամշակութային արժեքները:
Կ. Դանիելյանի կարծիքով, Երևանի քաղաքաշինության նկատմամբ վերջին տարիներին կատարվածը հանցագործություն է երևացիների ու Երևանի նկատմամբ: Ըստ նրա, բարոյական առումով Նարեկ Սարգսյանը հանցագործ է:
Նույն կարծիքին է ասուլիսին ներկա «Ժառանգություն» կուսակցության նախկին անդամ, հրապարակախոս Կարինե Հակոբյանը: Նա նշեց, որ Երևան քաղաքն ունի բազմաթիվ չլուծված խնդիրներ` սոցիալական, բնապահպանական, մշակութային` «թողնել դրանք ու հանճարեղորեն լուծված հրապարակը նորից փորձել խզբզել, հերթական հանցագործությունն է»:
Ճարտարապետ Սևադա Պետրոսյանն էլ ասաց, որ մրցույթի հայտարարությունը կարդալիս երկու միտք է առաջանում` գրողները բացարձակապես անտեղյակ են մրցույթներ կազմակերպելուց, կամ ընդամենը շղարշ է անձնական խնդիրները լուծելու համար:
«Առաջին հերթին որևէ հիմք, ելակետ չունի մրցույթը, որևէ ձև հստակեցված չէ` իրատեսական, թե կոնցեպտուալ մրցույթ է: Չի կարող մրցույթ լինել քաղաքի լոկալ հանգույցի համար, եթե չկա այդ մասին հայեցակարգը»,- նման դիտարկումներ արեց ճարտարապետը:
Նրա խոսքով, կա հաստատված գլխավոր հատակագիծ, որով պետք է լուծվեն բոլոր խնդիրները, նաև տրանսպորտային: «Եթե հրապարակի առումով այս հարցը լուծված չէ, նշանակում է, որ կամ գլխավոր հատակագիծն անկատար է, կամ կատարողները ի զորու չեն ի կատարած ածել»,- ասաց Ս. Պետրոսյանը:
Նրա կարծիքով, նման մրցույթ հայտարարելով ցանկանում են այլ ծրագիր իրականացնել. «Շղարշ է նախապես ծրագրված այլ ծրագրի, կամ էլ փորձում են բավարարել մեկ անձի կամ մի քանի մարդկանց անձնական ամբիցիաները, նաև ստեղծագործական ամբիցիաները»: Կարինե Դանիելյանը հավելեց. «Նաև ֆինանսական»:
Նախորդող նորություններ`
Կ. Քոչարյան. «Նարեկ Սարգսյանն ինչ ուզում անում է, իսկ քաղաքապետարանն էլ ոնց որ մեխի գլուխ լինի» (Տեսանյութ)
«Հայնախագիծ» ընկերության տնօրեն. Փորձում ենք Հանրապետության հրապարակը համահունչ դարձնել այլանդակված շրջապատին
«Հայտարարված մրցույթը չի նշանակում որևէ կառույցի իրականացում». Պարզաբանել է Երևանի գլխավոր ճարտարապետը
Լրահոս
Տեսանյութեր
Ինչո՞ւ հանկարծ ՀՀ իշխանությունները որոշեցին խլել արցախցիների կենսաթոշակային խնայողությունները
